الابن

يا والدة كانك علي دماعة ****بالفاتحة ما تغفليني ساعة
ما تغفلي مضنونك ****كانه عليك يعز كيف عيونك
وادعيلنا بصحة البدن يصونك ****وقتن تحطي جبهتك في القاعة
يا والدة حالو علي دونك *** فجوج موحشة تصعب على القطاعة
ما تغفليش وليدك ***وفي عقاب كل صلاة مدي يدك
وادعيلنا بالخير يرحم سيدك ****كانك علينا كبدتك ملتاعة
المكتوب يا امي غلب تشديدك **** زاد هزني كثر البغر واوجاعه
كثر البغر قلقني *** رخص علي فراقكم طاوقني
سيدي شواني بالنكد حرقني *** كثر علي بالكلام متاعه
في بلادكم ما لقيت ما واثقني ****سلمت في المحراث واللي باعه
سلمت ززت بلادي *** من وطنا وحدي خرجت فرادى
من العكس ما جاني على مرادي ****مشيت دغري متخفي بلا شياعه
على الماكلة حارم مقات افادي **** والقلب دايخ كتبته تداعي
كتبته تصرف ****والعبد معنداش وين يحرف
يكذب وينفخ بالحنك يخرف ****على قدرة المكتوب قاصر باعه
لكن اذا لاطه الدرك يطرف **** يخش بر ما يهسش على السماعة
يدخل برور فريقه *** بصبره كثر البعد والضيقه
قلبي بالنار فيه طليقه**** صابر يعاني كتبته وافراعه
اما جلب الرزق واتي سيقه****والا رقد في القبر مد كراعه

الاب

والله يا مضنوني ****نحساب معملتش معاك الدوني
نحساب انت فص ميم عيوني *** وفص الميامي ما يجي شيء في رداعه
استاقضت نلقى لفع في عبوني **** بلا فتن غارت قوم على التراعه
نحساب انت ولدي **** نحساب فارح بيك ماذا عندي
لن درتلي يا كبد كيف الهندي **** اللي ياكله يخرز الشوك اصباعه
قريت صبيتك ودرتك ندي **** نهيناك عن جنس الرذيل استاعه
نحساب روحي سيدك **** نحساب روحي نصرتك وعضيدك
نحساب نشرك نرقعك ونفيدك *** بطال ما تشبح درك وانزاعه
وكيف ولى نصحي مر بصح يكيدك **** لازم يولو اللي يظهروا شياعه
نحساب ماشي تقري **** تجيب الدواره والذهب الفري
لن درتلي يا كبد كيف الكري **** بلا قط زرت القصر والقصاعه
انا شعفت من التوري لش نوري **** وليت مكره كلمتي وجاعه
نحساب انت روحي **** كبرك نهضتي وقروحي
نحساب انت مرتعي وصروحي ***درجحتني بين السما والقاعه
وعملتلي مشهاب في جلوحي ***** نخاف نمرق يضحكوا السماعه